VIGAN CITY – “In denial” kasta ti marikrikna ita ti Rank 7 iti August 2024 Psychometrician Licensure Examination ta saanna nga impagarup a karaman kadagiti topnotcher gapu iti kinarigat ti exam-da.
Iti pannaki-uman ti Bombo Radyo Vigan ken ni Jerrimae Rhose Anne Ragudo a nagadal manipod University of Northern Philippines ken agnaed idiay Barangay 4, Vigan City, Ilocos Sur ti laeng kangrunaan a kararagna ket makapasa ket uray 75% laeng ti iskor a maalana ket naragsaken ngem nasursurok pay iti naipaay kenkuana.
Segun ken ni Ragudo, napalaus ti panagyamanna iti panagranggona iti exam ta nasukatan amin a nagrigrigatanna ta uray adda trabahona ket aminado nga ipapaayna latta iti orasna tapno makareview nangruna nu weekend.
Kinunana a nakaimulan iti panunotna a saanna a kayat a madismaya ti nagannak, pamilia, gagayyem ken amin a mamati kenkuana ta dakkel a karit kenkuana ti kaadda ti latin honor-na idi nagturpos.
Aminado a narigat iti naisayangkat nga exam ngem inaramidna dagiti nasursurona idi agrev-review pay laeng nga isu ti elimination kadagiti pagpilian, banag a nakatulong kenkuana tapno ipasa iti exam.
Nagyaman kadagiti amin a timmulong ken simmuporta para iti panangun-odna kadagiti arapaapna nangruna ti pamilia ken gagayyemna.
VIDEO – PSYCHOMETRIAN JERRIMAE RHOSE ANNE RAGUDO
