Madanagan ni Senador Raffy Tulfo iti agtultuloy a panagadu ti kaso ti leptospirosis kadagiti flood-prone area iti pagilian.
Maibasar iti Department of Health, sipud Hunyo 8 agingga Agosto 7, 2025 ket umabot iti 2,396 ti opisial a kaso ti leptospirosis kadagiti government hospital, ken limapulo ket dua ti pimmusayen.
Iti impila ni Tulfo iti Senado a Resolution No 75, kayatna a maimbestigaran ti nasao a parikut ken allukoyen ti gobierno a mangbukel iti strategic mapping system tapno makita no ania dagiti barangay wenno lugar nga adda nangato a kasona iti leptospirosis.
Segun iti senador, iti panangkita kadagiti targeted flood-prone area, nadardaras ken naep-epektibo a maited ti gobierno dagiti kasapulan nga agas kontra leptospirosis ken masigurado a naka-standby a doktor kadagiti health center ti barangay nga agireseta.
