Pormalen a nalukatan ken nangrugi ti Region 1 Athletic Association wenno R1AA meet ita a tawen.
Iti opening message ni Governor Jeremias “Gerry” Singson, pinasingkedan na a ti kompetision ket mangipakita iti panagkaykaysa ken nasayaat a langen-langen iti rehiyon Uno.
Impaganetget ni Singson a ti misyon ket saan a ti panangabak iti daytoy a kompetision no di ket iti panangipatulod iti nalalaing nga atleta iti Palarong Pambansa.
Kayat ti gobernador a maammoan iti nabatbati a paset ti pagilian a ti Region 1 ket powerful house iti talento, disiplina ken sportsmanship.
Iti met nagbalin a mensahe ni Philippine Sports Commission Chairperson Honorable Patrick “Pato” Gregorio, guest speaker iti Opening Ceremony ti R1AA, impaganetget na nga adu dagiti agdamdamag kenkuana no apay a matuloy latta dagiti paay-ayam iti baet ti tension idiay Middle East.
Para kaniana, saan a naan-anay a rason ti riri dagiti nataengan tapno lapdan ay-ayam ken ti arapaap dagiti ubbing.
Pinasingkedan ni Gregorio a saan a nasken nga i-sakripisio ti balligi dagiti ubbing iti mapaspasaran a giyera iti nadakamat a rehiyon.
Kabayatanna, nabara met ti pinangpasangbay ni Candon City Mayor Eric Singson iti amin a delegado iti siudad nga isu ti host ita a tawen.
Nagyaman ni Singson ken ni PSC Chairperson Patrick “Pato” Gregorio iti presensiya na iti panaglukat iti R1AA 2026.
