Impasigurado ti maysa nga Overseas Filipino Worker idiay Qatar a kontrolado ti pagilianda ti mapaspasaranda a riribuk isu a nasken nga awan ti pagdanagan dagiti pamiliada nga adda ditoy Pilipinas.
Iti pannaki-uman ti Bombo Radyo Vigan ken ni Bombo International News Correspondent Ey Oliveros Bayog, 99 percent a malaplapdan ti Qatar dagiti maipabpabanto a missile isu a natalekda a protektado ida ti Qatar government.
Aminado a no dadduma a makangngegda kadagiti kumanalbuong nga uni ket saanda a maliklikan ti agdanag ngem uray kasta ket natalged pay laeng met ti kasasaadda iti agdama.
Ibilang ni Bayog a normal pay laeng met ti mobility iti nasao a pagilian ngem nabalakadan laeng ida a saanda nga agkararuar iti pagtaenganda.
Iti agdama, awan ti serrek kadagiti dadduma a pagubraan iti nasao a pagilian idinto a dagiti dadduma ket sursurotenda ti work from home setup.
