Dead on arrival ti maysa a person with disability gapu ti pannakadungparna iti bus iti national highway sakupen ti Barangay Imus, Santiago, Ilocos Sur.
Ti biktima ket agtawen iti uppat a pulo ket siam a lalaki nga agnaed ti Barangay Imus, Santiago.
Ti met nagmaneho ti bus ket lalaki nga agtawen ti limapulo ket dua, naasawaan, ken residente ti Barangay Gonzalo, San Quintin, Pangasinan.
Iti pannaki-uman ti Bombo Radyo Vigan ken ni PLt. Jaime Caban Jr. ti Santiago Municipal Police Station, daldalyasaten ti bus ti national highway nga agturong iti amianan a direksion ket idi nadanonna ti nakapasamakan ti insidente ket dita a nadungparna ti biktima a bumallasiw.
Pinadas a liklikan ti drayber ti bus babaen iti ipapanna iti outer lane ngem nagsubli a nagpaigid ti biktima isu a nadungpar latta ti pedestrian.
Nagsagaba ti dunor iti nadumaduma a paset ti bagi ti biktima a dagus a naipan ti balay pagagasan ngem naideklarar a dead on arrival. /Reynand Fontejon
