Natay gapu iti pannakalmesna ti maysa a pulis idiay Sitio Malamiis, Baballasioan, Sta. Maria, Ilocos Sur.
Nabigbig ti biktima a ni Patrolman Arcie Barcena Maliongan, agtawen iti duapulo ket walo, naidestino idiay 2nd PMFC, Abra PPO, taga-Barangay Kili, Tubo, Abra.
Segun iti kadua ti biktima a ni PSSg. Jezzel Antonio Saguiyod, alas syete iti rabii ti January 21, 2025, simmangpetda iti lugar tapno ag-spear fishing idiay Baballasioan Spillway, paset iti karayan.
Idi agalas nuebe iti rabii, limmung-aw ti biktima tapno umanges sa timmapog manen sakbayda nga agawid.
Kalpasan ti sumagmano a minutos, nadlaw ni Saguiyod a saanen a limmung-aw ti biktima isu a timmapog a napan nangsapul ken mangtulong agingga a nasarakanna daytoy iti sirok ti karayan a saanen nga aggargaraw.
Imbangkag ni Saguiyod ti biktima ket insayangkatanna iti first aid ken CPR sa nagpaarayat kadagiti kaduada iti ABRA PPO ken Sta. Maria Police Station kasta payen ti MDRRMO-Sta. Maria.
Nagtultuloy ti pannakaipaay iti CPR iti biktima bayat iti pannakailuganna a maitaray iti ospital ngem naideklarar a dead on arrival.
