Kwinestyonaran dagiti senador ti Philippine Statistics Authority (PSA) gapu iti nabuntog a tignay kadagiti mapapati a peke a birth registration dagiti gangannaet iti pagilian pakairamanan iti kaso ti Chinese national a ni Joseph Sy.
Iti panagdenggeg iti Senate Committee on Justice, insaludsod dagiti agpampanday linteg no apay ita a Marso laeng ng inendorso iti PSA iti Office of the Solicitor General (OSG) ti kaso ni Sy uray nabayagen a nabigbig ti iregularidad iti birth certificate.
Ni Sy ket mapapati a nakaala ti Filipino birth certificate ken karaman iti illegal mining operations iti Brooke’s Point, Palawan.
Segun ken ni PSA Legal Service Director III Eliezer Ambatali, nangisayangkat ti ahensya iti nainget nga imbestigasyon pakairamanan iti panagbisita kadagiti local civil registry offices, panagadal dagiti dokumento, ken panang-verify kadagiti baptismal certificate kadagiti parokya.
Idi Pebrero laeng a nalpas iti imbestigasyon isu nga ita a bulan laeng a naipasa iti OSG ti kaso.
Ngem impagenetget ni Senador Risa Hontiveros nga idi Disyembre pay laeng ket binigbig iti PSA dagiti iregularidad iti birth certificate.
Inamin met ni Ambatali a naaddaan iti delay ngem kinunana a kayat ti PSA a makompleto pay amin a dokumento sakbay nga iendroso iti kaso iti OSG.
Kinuna met ni Senador Raffy Tulfo mangipila isuna ti gakat tapno palubosan iti PSA a direkta a kanselaren dagiti peke a birth certificate a saan a kasapulan iti dumalan iti OSG.
