VIGAN CITY- Naka-alerto ti sibubukel a provincial maritime group gapu kadagiti nagsasaruno a pannakadiskubre iti floating cocaine iti kabaybayan dagiti naduma-duma a lugar ditoy pagilian nangruna idiay Camarines Norte, kasta payen idiay Mindanao ken idi laeng kalman ket idiay Surigao del Sur.
Segun ken ni Senior Police Officer 1 Michael Montero, officer-in-charge ti Provincial Maritime Office, binilin dan dagiti coastal barangay intelligence network ken dagiti mangngalap, pakairamanan dagiti agnanaed kadagiti coastal barangay, nga ireport da nga insigida kadakuada nu adda dagiti mapagduduaan iti garaw na a makita da iti tingnga ti taaw tapnu maaksyunan nga insigida.
Inaklon na a ti bilang da iti agdama a sangapulo ket uppat ket saan da a kabaelan a bantayan ti nalawa a coastline ti probinsiya isu a kiniddaw da iti tulong dagiti agnaed kadagiti coastal barangay ken nu bilang adda ti dakkel nga operasyon da ket mabalin da a kiddawen iti tulong ti special operation team ti Regional maritime Office a tumulong kadakuada.
