VIGAN CITY – Impannakkel ti opisina ni Provincial Animal Quarantine Officer Martel Quitoriano nga inubrada amin a kabaelanda tapno mamanehar a nasiat ken madusa dagiti violators ditoy probinsya.
Iti panagsarita ni Quitoriano iti programa Ryanniag ti Ilocos Sur, kumpara kadagiti kabangibang a probinsya ti Ilocos Sur ket istrikto kadagiti paglintegan inaig iti panagiserrek dagiti pork products ken dingwen ta adda iti ordinansa a pangibasaran tapno malapdan ken maprotektaran dagiti agtartaraken ken umili ta adda pay laeng iti pangta ti African Swine Fever.
Iti panangidaulona ti Provincial Animal Quarantine Office manipod idi 2015 ket innem a pulo ket walo a milyon a pisos iti koleksyonda pakairamanan dagiti violators.
Adda dagiti kaso a madama iti pannakadenggegna ken adda met dagiti simmukon ken nagbayad ti muelta ket mangnamnamada a maadalan inaig iti iramidda a maikaniwas ti linteg.
Innayon ni Quitoriano a saan palaeng a mabalin a maipalubos iti panagiserrek dagiti baboy ta adda palang ti ASF ngem malaksid kadagiti mangpapaado ti baboy ditoy probinsya ngem masapol nga adda dagiti naananay a dokumento kas ti negatibo a resulta ti blood test ti ASF.
