Binilin ni Department of Education (DepEd) Secretary Sonny Angara ti amin a pribado nga institusyon a mangidi-diaya ti Senior High School (SHS) a pagbalinen a pormal a Government Recognition dagiti provisional permit-da inton School Year 2027-2028.
Iti salinong ti DepEd Order No. 12 series of 2026, gagem ti DepEd a papigsaen ti quality assurance, panagsungbat dagiti institusyon ken proteksyon kadagiti agad-adal.
Segun ken ni Angara, tigtignayan ti baro a polisiya ti nabayagen a pagkurangan ti regulasyon kadagiti private SHS program.
Maibasar ti listaan ti DepEd, 38% iti amin nga SHS schools iti pagilian ket pribado a pagadalan nga agserserbi iti mapatta-patta a 1.46 million Grade 11 ken 12 learners idi School Year 2024-2025.
Iti salinong iti baro a guidelines, ti Government Recognition ti agserbi a permanente a legal authority iti private SHS tapno maka-operate ken pammaneknek a sumursurot iti standards iti DepEd curriculum, faculty, facilities, learner support, leadership, planning ken finance.
Maaddaan ti one-year transition period iti School Year 2026-2027 tapno makasurot dagiti pagadalan a saan a maap-apektaran dagiti estudyante.
Segun ti DepEd, mabalin a maikkan ti automatic recognition iti dadduma a kualipikado nga institusyon pakairamanan ti FAAP-accredited schools, PEAC-certified SHSs, ken Strengthened SHS Pilot Schools.
Inton School Year 2027-2028, dagiti laeng private SHS nga adda Government recognition-na iti mapalubosan nga umawat ti Grade 11 learners iti salinong ti SHS Voucher Program.
