VIGAN CITY – Inlawlawag ni Ilocos Sur Hog Raisers Association President Edgar Tejada nga awan pay laeng ti ngimminaan iti presyo ti baboy ita nga addan ti kaso ti African Swine Fever virus iti Ilocos Sur.
Iti pannaki-uman ti Bombo Radyo Vigan ken ni Tejada, saan a rumbeng nga agipastrek dagiti tattao iti baboy ditoy probinsian nangruna kadagiti aggapu iti sabali a lugar.
Nabayagen a kidkiddawen ti nasao a grupo iti Department of Agriculture a rumbeng a makontrol koma iti culling operation protocol a maipatpatungpal kadagiti baboy nga adda iti 500 meter radius zone ta dakkel a gatad ti pagpupuunan dagiti agtartaraken iti baboy.
Kabayatanna, ingunamgunam ni Tejada a napateg a maidalan iti inspeksyon dagiti baboy sakbay a maikali pakairamananen dagiti bio-safety measure tapno saanen a maakaran dagiti dadduma pay a taraken.
Maysa ti swill feeding wenno ti panangpakan kadagiti baboy iti binugbog ti maysa kadagiti mapapati a pakaalaan dagiti baboy iti African Swine Fever virus kas pinasingkedan ti opisial.
