Awan pay ti napili ni President Ferdinand Marcos Jr. a baro a mangidaulo ti Philippine National Police a kasukat ni PNP Chief Rommel Francisco Marbil a nayatiddog ti terminona gapu iti eleksyon.
Segun ti Malakanyang, ipakaammoda kadagiti sumarsaruno nga aldaw nu addanton ti napili ni Pres. Marcos.
Kinuna ni Palace Press Officer Undersecretary Claire Castro, awan pay laeng ti impormasyonda mainaig iti posible a dutokan ni Pres. Marcos kas successor ni Marbil.
Karaman kadagiti nasikat a nagan nga strong contenders ket dagiti 3-star Generals a da Lt. Gen. Jose Melencio Nartatez a mapapati nga asideg ken ni Senador Imee Marcos ken CIDG Chief Major General Nicolas Torre III.
Nasikit ti nagan ni Torre gapu iti panangidaulona ti sensitibo nga operasyon kas ti pannakakemmeg ken ni Pastor Apollo Quiboloy ken dati a President Rodrigo Duterte.
Pinasingkedan ni Castro a nalalaing ken adda integridad dagiti nasao a nagan ngem nasaysayaat nga urayen laengen ti pakaammo ti presidente.
