Ibilang ni Pres. Ferdinand Marcos Jr. a dakkel a parikot iti pagilian ti online gambling malaksid pay iti umad-adu nga online scam babaen ti artificial intelligence ken digital currency.
Segun ken ni Pres. Marcos, agtultuloy nga agar-aramid iti addang ti gobierno tapno salakniban dagiti Pilipino kontra kadagiti sindikato nga agsapsapul babaen iti pananglimlimo.
Karaman ti addang ti pannakaipatungpal ti Anti-Financial Account Scamming Act, pannakayetnag ti E-Commerce Bureau para iti reklamo ken tulong iti online ken pannakaipatungpal ti SIM Registration Act tapno maliklikan dagiti peke a transaksyon.
Karaman pay dagiti addang iti gobierno ti panangted ti panagsanay kadagiti Pilipino para iti baro a trabaho iti AI, cybersecurity, ken e-commerce.
Kas tignay iti dumakdakkel nga isyu iti online gambling ket impasardengen iti gobierno ti access iti sumagmamano a mobile apps ken website a maar-aramat iti sugal tapno masalakniban iti publiko ken ti sistema ti finance iti pagilian.
