Kinumpirmaran ti Civil Aviation Authority of the Philippines (CAAP) nga awan ti nadunor kalpasan a nauram ken bimtak ti maysa a power bank iti Initial Security Screening Checkpoint iti Roxas Airport.
Naduktalan dagiti kameng ti airport ti power bank nga adda kapasidadna a 72,000 mAh iti uneg iti bagahe iti maysa a babai a pasahero nga agturong idiay Manila.
Naglabes dayta iti maipalubos a 160 watt-hour a kapasidad para kadagiti power bank a mablin a mailugan iti eroplano.
Impaganetget ti pasahero a naipalubos iti nasao a power bank iti flightna manipod Manila ngem immannugot met laeng a nangibati iti kaduana iti ruar ti terminal.
Segun ti CAAP, bayat a masimsimpa ti pannakaited ti item ket kellaat a nauram iti rabaw iti inspection table.
Insigida a nagresponde ti maysa a security guard iti airport ken nagaramat ti fire extinguisher tapno madepdep iti apoy ngem kalpasan laeng iti sumagmamano a segundo ket bimtak ti power bank.
Nupay kasta ket awan iti nakaru a nadadael gapu iti insidente.
Kabayatanna, dinayaw ti CAAP ti napaspas ken epektibo a tignay ti airport security ken dagiti screening personnel iti Office for Transportation Security (IS).
