Vigan City – Mangnamnama ti Commision on Human Rights nga adalen ken simpaen ti Senado ken Kongreso iti position paper nga impasada inaig kadagiti problematic provision ti Anti-Terror Bill a sinertipikaran nga urgent ni Presidente Rodrigo Duterte.
Iti pannaki-uman iti Bombo Radyo Vigan kenni CHR Commissioner Atty. Jacqueline de Guia, nakunana a nakailanad iti position paper iti opinyonda iti gakat ta kalikagumda laeng a salakniban iti interes iti kaaduan.
Ingunamgunam ni De Guia nga adu unay iti depinisyon iti terorismo, naatiddog unay iti panawen a maibalud dagiti mapapati a terorista, posible a maabuso iti linteg ken agbalin a dakkel a karit kadagiti pannakabagi ti linteg iti pannakaiyetnagna tapno masurot a nasayaat iti nasao a gakat.
No pay kasta ket kinuna ni De Guia a no maipasa iti nasao a gakat ket siguraduenda nga agbalin a napudno ti CHR tapno aramiden a nasayaat iti trabahoda para kadagiti mandato.
Kabayatanna, nakailanad pay iti gakat a rumbeng nga agreport dagiti law enforcement agency ti CHR, sumurot iti Korte no adda makemmeg ken siguraduenda a nasayaat iti kasasaad dagiti mapapati a terorista.
