Bambantayan ita ti Philippine Atmospheric Geophysical and Astronomical Services Administration ti posibilidad iti napipigsa a bagyo, agraman ti super typhoon, kagiddan ti manamnama nga iseserrek ti El Niño phenomenon iti pagilian kadagiti sumaruno a bulan.
Inlawlawag ni Climate Monitoring and Prediction Section Head Ana Solis a saanna kayat a sawen a no El Niño ket dry season laengen ti mapasaran.
Segun ken ni Solis, mabalin a mangitunda latta iti nakaro a bagyo a mabuyogan iti napigsa a tudo ken angin.
Maibasar iti forecast ti PAGASA, posible a marikna ti nasao a paniempo manipud Setyembre agingga Nobiembre 2026.
Mabalin a maipada ti nasao a pattern kadagiti naglabas a bagyo kas ti 2023 ken 2024 a nakapasamakan ti napipigsa a bagyo uray no panawen idi ti El Niño.
