VIGAN CITY – Nalawlawan iti sakupen a panagtest iti covid-19 iti gagem ti House Bill 6865 wenno Crushing Covid-19 Act a nakapasa iti maikadua a pannakaibasana idiay Kamara idi naminsan a manamnama iti pannakaipasana iti maikatlo a pannakaibasana inton Huebes.
Iti pannaki-uman iti Bombo Radyo Vigan kenni dati a Health Secretary ken agdama nga Iloilo 1st District Rep. Janette Garin, gagem ti nasao a gakat a ma-test dagiti vulnerable asymptomatic iti covid-19 ngem tapno saan nga agbalin a nagastos ket maisayangakt iti pool testing.
Impalawag ni Garin a ti pool testing ket mapagtitipon dagiti sangapulo a tattao para iti maysa a testing a kas no addaan iti sangaribo nga emplyado iti opisina ket maidalan iti swab testing ken maigrupo iti sangapulo ket maisayangkat iti 100 a test.
Kinunana pay a saanto unayen a nagastos iti gobierno iti nasao a banag ta posible pay a maaddaanda ti saving ta sangapulo a porsiento laeng iti magastos.
Innayonna pay a ti sakop iti nasao a gakat ket dagiti non-health frontliner, masikog, mangmangged nga addaan high blood, diabetes, sakit iti puso ken asthma.
