Maysa a police dog idiay China ti naksayan ti bonus-na ta naduktalan a matmaturog iti trabahona.
Daytoy nga aso ket nabigbig a ni Fu Zai, kayatna a sawen, “Lucky Boy”, naikappeng iti Weifang Public Security Bureau idi January 2024 kas maysa a reserve explosives detection dog.
Uray no bassit ti pammagina, napabilibna dagiti trainer na gapu iti laingna a makaangot kadagiti pampabettak.
Iti sangapulo ket walo a bulanna, opisial a nagbalin a police dog idi Oktubre ket gapu iti dedikasyonna, naikkan iti maysa a year-end performance review.
Ngem segun kadagiti opisial, mano a daras a natiliwanen a matmaturog no naka-duty ken umisbo pay iti food bowl wenno pangananna isu a nagdesisyon dagiti handler nga ibabawi ti treats ken ay-ayamna kas pannusa.
Uray no nakabasul, naipaayan latta iti Annual Award of Defying Fate kas pammigbig iti determinasyonna.
