Saan nga ikkaten ti Philippine National Police (PNP) ti posibilidad a pagbalinen nga state witness iti dadduma a polis a naidalan iti restrictive custody mainaig iti kaso ti missing sabungeros.
Segun ken ni PNP Chief PGen. Nicolas Torre III, saan pay laeng a mangiruar ti detalye mainaig ti status dagiti polis ngem maysa dayta kadagiti direksyon a mabalin a kitaenda.
Kinunana a nu adda iti sumagmamano kadakuada iti boluntaryo nga umamin wenno agsarita ket dakkel a banag tapno maituloy iti imbestigasyon.
Kabayatanna, kinuna ni National Police Commission Vice Chairperson ken Executive Officer Atty. Rafael Vicente Calinisan a nakaawatdan kadagiti feeler manipod iti agduduma nga indibidual nga adda pakainaiganna iti kaso.
Iti agdama ket sangapulo ket lima a polis iti naidalan ti restrictive custody idiay Camp Crame gapu iti pannakainaig ti pannakadukot dagiti sabungero kas maibasar ti pinasingkedan dagiti whistleblower ken co-accused a ni Julie “Dondon” Patidongan wenno alyas Totoy.
Dagiti nasao a polis ket nakadeploy iti support units, regional units ken area police command a ti maysa kadakuada ket dandanin nga agretiro idinto a ti maysa ket na-dismiss iti serbisyo.
