Nagpalagip ti Philippine National Police a saan a costume ti unipormeda ken sumango iti criminal offense ti asino man a saan nga otorisado nga agisuot.
Kasaruno daytoy ti panangibaga ni PNP Spokesperson Brig. Gen. Randulf Tuaño nga ad-adalenda ti posible a reklamo kontra iti vlogger a ni Francis Leo Marcos, a nag-viral kalpasan a nagisuot iti uniporme ti pulis ken nagkarit iti dinnanog ken ni Police Regional Office 2 Director Brig. Gen. Antonio Marallag Jr.
Segun iti PNP, ti saan nga otorisado a panagisuot iti uniporme wenno insignia ti kapulisan ket adda pannusana a pannakaibalud iti maysa bulan ken maysa aldaw agingga innem a bulan iti salinong ti Article 179 ti Revised Penal Code.
Pinalagipan ti PNP dagiti establisimiento a ti panagaramid, panagilako, ken panangiwaras iti uniporme ti pulis nga awan pammalubosna ket mailabsing iti Executive No 297, ken mabalin a maipasarra ti negosyo, makumpiskar ti produkto, makanselar ti lisensia ken mamuelta.
