Maipila ti kaso a Reckless Imprudence Resulting in Homicide kontra iti maysa a nagmotorsiklo a nakadungpar iti senior citizen iti national highway ti Barangay Libtong, Tagudin, Ilocos Sur kabayatan ti panagballasiwna a mangipagpagna iti bisikletana.
Ti nagbisikleta ket lalaki nga agtawen iti pitopulo ket dua, ice cream vendor, taga-Barangay Bimmanga, Tagudin.
Ti met nagmotorsiklo ket lalaki nga agtawen iti tallopulo ket innem, taga-Barangay Magsaysay, Tagudin.
Iti pannaki-uman ti Bombo Radyo Vigan ken ni PLT. Aidan Joshua Aguilar, agpapa-amianan ti motorsiklo idinto a ti senior citizen ket bumalballasiw a mangipagpagna iti bisikletana.
Adayo pay laeng ti nagmotorsiklo ket nakabusinan isu a nagsardeng met ti senior citizen nga agballasiw iti kalsada.
Ngem idi makaasidegen ti motorsiklo ket intuloy latta ti senior citizen ti bimmallasiw isu a nadungpar.
Nadunor ti ulo ken natukkol ti kannawan a saka ti senior citizen idinto a ti nagmotorsiklo ket nagasgasan ti tumengna.
Naitarayda iti ospital ngem naideklarar a dead on arrival ti senior citizen a naduktalan a nakainom idi napasamak ti aksidente.
