Pinalawa ti Philippine National Police agingga cyberspace ti panangbantayda iti seguridad ti Undas 2025.
Segun ken ni PNP Chief PLT. General Jose Melencio Nartatez Jr., malaksid kadagiti kamposanto ken transport hubs ket bantayan pay ti kapulisan ti cyberspace tapno masigurado ti kinatalged ti publiko iti panangrambak ti piesta ti natay ken karkararua.
Agtinnulong ti police cyber unit ken regional monitoring hub nga agbantay iti social media chatter ken dagiti digital incident report a mabalin a mangapektar iti seguridad wenno misinformation.
Binilin ni Nartatez ti Anti-Cybercrime Group a bigbigen ken lapdan dagiti peke nga advisory, phishing message, ken online scam nga agpampammarang a mangted iti travel assistance wenno cemetery services.
Iti agdama, awan pay ti pangta iti seguridad ti PNP iti umadani nga Undas idinto a 25,300 a pulis ken 22,000 a force multipliers ti naideploy iti intero a pagilian tapno agbantay.
