Binilin ti Philippine National Police dagiti lokal a kapulisan a siguradwen ti kasasasaad dagiti opisial a naka-duty, nangruna dagiti agisaysayangkat kadagiti patrolling ken checkpoint iti baet ti nabara a sirnaat ti init.
Segun ken ni PNP Chief Police General Jose Melencio Nartatez Jr., kasapulan a masalwadan dagiti pulis manipud kadagiti gagangay a parikut iti salun-at ita a panawen, kas ti heat stroke.
Kunana a dagiti pulis a naka-field duty ken nasken nga agtalinaed a hydrated iti amin nga oras ken maaddaan iti husto nga oras ti trabaho wenno shifting tapno maliklikan ti napaot a pannakaibilagda iti init.
Binilin ni Nartatez dagiti hepe ti kapulisan ken dagiti unit commander a kitaenda a naimbag ti deployment strategy kadagiti personnel tapno saan a maisagmak ti salun-at dagiti mai-deploy iti field.
Manamnama nga umabot iti kangatwan a temperatura kadagiti bulan ti Abril ken Mayo, segun iti PAGASA.
