PNP personnel idiay G. Del Pilar, nagdait ti improvised face mask

VIGAN CITY – Dakkel a tulong para kenni Police Staff Sergeant Orland Dangtayan Victorio ti Gregorio Municipal Police Station iti Skills Training nga indiaya ti Technical Education and Skills Development Authority ta nakasursuro nga agdait.

Babaen iti dayta, nagdait ni Victorio ti improvised face masks para kadagiti kakadua na a pulis nga usaren da iti kangitingitan ti coronavirus disease 2019 (COVID- 19)

Segun kenni Victorio, nakaiwaras dan kadagiti kakadwa da a frontliners iti nasao nga ili kadagiti inaramid na a face mask.

Malaksid iti dayta, naikkan da payen dagiti agindeg iti nasao nga ili ti inaramid na a face mask agsipud ta awanen iti magatang.

Dagiti dadaiten na a face mask ket naaramid babaen kadagiti daan a bado a naidonar ken indisinfect da tapnu masigurado a nadalus.