Inlawlawag ti Pasig City Police nga awan ti pagilasinan iti foul play ti pannakatay ti maysa a grade 9 student a ni Isabelle Sophia Tablate nga immunan a naipakammo a mapukpukaw idiay Pasig City.
Segun ken ni Captain Rodolfo Rabago, team leader ti Crime Scene Operatives maibasar iti assessment-da iti lugar ket awan ti pagilasinan a napapatay wenno adda kinaranggas a napasamak ken ni Tablate.
Segun ken ni Pasig Police Deputy Chief Major Loreto Tigno, naudi a nakita a sibibiag ni Tablate kalpasan a rimmuar iti maysa a mall iti Marikina tapno gumatang iti nylon cord ken nakita a napan iti nalidem a lote ti LRT-2 idi rabii ti Marso 18.
Kitkitaenen ti imbestigador ti posibilidad a mangisayangkat iti digital forensic examination iti cellphone ni Tablate iti namnama nga adda pay maala a sabali nga impormasion.
