Impasigurado ti Philippine National Police a masukon ken matiliwda dagiti dadduma pay nga akusado a karaman iti mapapati a korapsion kadagiti flood control project, agraman ni dati nga Ako Bicol Partylist Rep. Zaldy Co.
Dayta ket kalpasan a binilin ni PNP acting chief Lt. Gen. Jose Melencio Nartatez Jr. dagiti unit ti kapulisan a pabilgenda ti panagtiliwda isu nga immadu dagiti suspek a boluntaryo a simmuko wenno matiltiliw kadagiti operasion ti kapulisan.
Dinayaw ni Nartatez ti Criminal Investigation and Detection Group ken Aviation Security Group iti pannakakemmeg idi Martes ti maika-siam nga akusado a ni Engr. Montrxis Tamayo.
Nakemmeg ni Tamayo, officer-in-charge ti Planning and Design Division ti DPWH-Mimaropa idiay NAIA Terminal 3 idi sumangpet manipud UAE.
Adda pakainaiganna daytoy iti dua nga arrest warrant ti Sandiganbayan para iti malversation through falsification ken panaglabsing iti Anti-Graft and Corrupt Practices Act mainaig iti P289 million nga anomalya iti road dike project idiay Oriental Mindoro.
