Imbilin ni Philippine National Police Chief PGEN. Jose Melencio Nartatez Jr. ti panangpapigsa iti presensia dagiti pulis ken panagsagana dagiti kameng ken kadagiti alikamen para iti panagresponde iti epekto ti bagyo Inday kadagiti sumagmamano a paset ti pagilian.
Uray no saan a direkta a nag-landfall, nangitunda ti bagyo iti panagreggaay ti daga ken pannakalayus dagiti dadduma a lugar, kangrunaan iti Visayas ken Mindanao, a nakatayan dagiti 29 nga inbidual ken 14 ti mapukpukaw.
Segun ken ni Nartatez, aktibo ti PNP iti search and rescue operations, clearing operations, panangipaay iti ayuda, ken dadduma pay nga addang para kadagiti apektado iti didigra.
Immunan a naibayog iti heightened alert status dagiti police unit iti intero a pagilian tapno dagus a makaresponde kadagiti kasapulan.
