Linagip ti Philippine National Police ti kinabannuar dagiti imbilangda a SAF 44, dagiti kameng ti PNP-Special Action Forces a natay iti lehitimo nga operasion idiay Mamasapano, Maguindanao, sangapulo ket maysa a tawen ti napalabas.
Indaulwan mismo ni Police Regional Office 12 Regional Director PBGen. Arnold Santiago ti panangisagut iti sabong kadagiti bannuar a pulis iti napasamak a seremonia idiay Pabalinas Monument Park, iti uneg ti Camp Fermin G. Lira Jr. idiay General Santos.
Iti nagbalin a mensahe ni Santiago, dinayawna ti kinatured ken kinabannuar dagiti SAF 44 a nangisagut iti biagda para iti kappia, saan laeng nga idiay Mindanao, no di ket iti intero a pagilian kontra iti pangta ti terorismo.
Maipalagip nga idi 2015, natay dagiti 44 a miembro ti PNP-Special Action Force iti maysa a counterterrorism operation idiay Tukanalipao, Mamasapano, Maguindanao.
