Agplamplanon ti Philippine National Police iti panangidatagda iti seguridad iti umadani ken maikapat nga State of the Nation Address ni Presidente Ferdinand Marcos Jr inton July 28, 2025.
Indaulwan ni PNP Chief Gen. Nicolas Torre III ti command conference idiay Camp Crame a dinar-ayan dagiti miembro ti Command Group, Regional ken District Directors ti NCRPO ken dagiti director ti Operations, Investigation and Detection Management, Intelligence, ken Police Community Relations.
Segun ken ni Torre, bassit laeng a sakripisyo ti panagriing iti masapa kumpara iti talek nga ipapaay dagiti umili kadagiti programa ti PNP.
Impaganetget ti opisial ti kinapateg ti panagkaykaysa, panagbalin a naridam ken nagaed a panangidaulo tapno masigurado ti naurnos ken nakappia a pannakaisayangkat ti SONA.
