Nakipagladingit ti Philippine National Police iti ipupusay ti maysa a pulis a natay iti aksidente iti kalsada mano nga oras kalpasan a makompleto ti 24-oras a security deployment para iti State of the Nation Address ni Presidente Ferdinand Marcos Jr.
Nabigbig ti natay a pulis a ni Patrolman Allan Chris Heredero, agtawen iti tallopulo ket tallo, naidestino iti Administrative Holding Unit–Regional Mobile Force Battalion (AHU-RMFB) ti NCRPO.
Nadungpar daytoy iti maysa a 10-wheeler truck iti C3 Road idiay Barangay 22, Caloocan City.
Nakalugan ni Heredero iti motorsiklona nga agawid idi mapasamak ti aksidente.
Maibasar iti inisyal nga imbestigasion, kinuna ti drayber ti trak a saanna a napuotan nga adda motorsiklo iti abay ti luganna idi nagsilaw ti green traffic light.
Impasigurado ni PNP Chief Police General Jose Melencio C. Nartatez Jr. iti pamilia ti pulis a saanda a mabaybay-an iti panawen ti panagladingitda.
