VIGAN CITY – Nakasagana a dumalan ti 14-day quarantine dagiti Filipino workers idiay Daegu, South Korea nu isu laeng iti pamuspusan tapnu makaawid da ditoy pagilian iti kangitingitan iti naiyetnag a travel ban gapu ti coronavirus disease 2019.
Segun ken ni Bombo International Correspondent Jhonel Realin a taga- Tamurong, Sta. Catalina ngem maysa a factory worker idiay Daegu, South Korea, agleppas ton inton maikatlo a lawas ti Marso iti kontrata da ket masapul nga agawid da tapnu saan da a maideklerar a TNT nangruna ket pagsubsubliyen ida dagiti boss da.
Pinasingkedan na nga arigna nagbalin a ghost town iti sumagmamano a paset ti Daegu agsipud ta awan unayen dagiti tattao a rumrumwar kadagiti pagtaengan da gapu iti amak da a maapektaran da iti nasao a sakit.
Innayon na a ti laksid nga addan dagiti pagtrabahoan a nagsarra gapu ti COVID- 19, adda pay laeng met dagiti pagtrabahoan a tuloy latta iti operasyon da a kas iti pagtrabtrabahoan na a textile company.
Kabayatanna, idiay Japan, uray nu inpasardeng ni Japanese Prime Minister Shinzo Abe iti serrek dagiti agad-adal iti elementarya ken high school, agreport latta dagiti mangisursuro kadagiti pagadalan a pagisursurwan da a kas pinasingkedan ni Bombo International Correspondent Jennifer Pauline Mercurio a taga- Cabaroan, Bantay ngem agtrabtrabaho ti maysa a private Christian school idiay Japan ken agdama nga agnanaed ita idiay Ikeda City, Osaka Prefecture.
Innayon na a saan da unay nga agdandanag gapu ti COVID- 19 ngem madlaw kadagiti adda idiay Japan iti panagridam da kontra iti nasao a sakit agsipud ta naibusan payen iti suplay ti face masks dagiti sumagmamano a paggatangan ken adda dagiti supermarket a nagsarra ta pinalayasan iti disinfectant dagiti akin-kukua.
