VIGAN CITY – Nagsapata dagiti miyembro ti Philippine National Shooting Association (PNSA) ken ni Narvacan Mayor Luis “Chavit” Singson nga isu ti presidente da nga adu iti balitok a medalya a maala da iti maisayangkat to a maika-tallo pulo nga edisyon ti Southeast Asian Games inton November 30 agingga December 11 ditoy pagilian.
Idi kalman, sinangaili ni Singson dagiti atleta ti PNSA a makisalip ti shooting competition ti SEA Games ket inkari da kenkuana nga aramiden da amin a kabaelan da tapnu makaala da iti adu a balitok a medalya ket makatulong da iti panang-gun-od ti Team Philippines iti kalikagum da a maibati ditoy pagilian iti over-all championship title ti nasao a regional biennial meet.
Ti napalabas a pannaki-uman ti Bombo Radyo Vigan ti PNSA presidente, nadakamat na nga adda iti “internal politics” a napasamak iti pannaka-ikkat dagiti sumagmamano nga events iti shooting competition ti SEA Games ta posible a kinapatang dagiti sumagmamano nga opisyal ti shooting association iti sabali a pagilian ti organizer ti sporting event ket inpaikkat da dagiti sumagmamano nga events ta awan iti atleta nga ipatulod da a makisalip.
Nu pay kasta, agtalek ti PNSA president iti kabaelan dagiti Pinoy shooters ket ited na kadakuada iti sibubukel a suporta na.
