Maysa nga agtawen ti sangapulo ket pito a Pilipino ti natay kalpasan a maipagarup a natinnag iti kabaybayan bayat a magmagna iti railing ti maysa a rangtay idiay Peng Chau, Hong Kong.
Basar iti report, makipatpatang ti barito iti dua a giyyem na bayat a nakatugaw iti railings ti Chau Tsai Bridge.
Maipagarup a timmakder ti barito iti railing ken nagna ti sumagmamano nga addang sakbay a maawanan ti balanse ken natinnag iti kabaybayan.
Nakita pay dagiti 2 a giyyem ti barito ken pinadas da nga aglangoy a mapan iti baybay ngem dagus a nagpukaw ti biktima.
Nasarakan dagiti nagresponde a bumbero ti barito nga awanen ti puot-na iti mapatta-patta a duapulo a metro manipud iti kabaybayan.
Naitaray pay ti biktima iti Pamela Youde Nethersole Eastern Hospital idiay Chai Wan ngem naideklarar a pimmusay.
