VIGAN CITY- Maiyur-uray pay laeng nu kaanu ti tabon ni Maricar Valdez Arquiola, ti Pinay domestic helper a biktima ti Cypriot soldier a serial killer.
Maipalagip nga idi July 28 a naisangpet idiay Gabur Norte, Sta. Cruz iti bangkay ti biktima a naggapu idiay Cyprus.
Ti bangkay ni Arquiola ket nasarakan iti uneg ti maleta a naibelleng idiay Red Lake Mitsero, Cyprus idi napalabas a bulan.
Segun ti kabsat ti biktima a ni Allen Arquiola iti pannakipatpatang ti Bombo Radyo Vigan, December 13, 2017 idi napukaw iti komunikasyon da ken ti kabsat da agingga nga idi June 4, 2019, nakaawat da iti impormasyon manipud ti ina da idiay Cyprus a nasarakan iti bangkay ni Maricar iti uneg ti maleta a naibelleng idiay Red Lake ken maysa isuna kadagiti biktima to serial killing iti nasao a pagilian.
Naulila ti biktima ti live in partner na ken ti kakaisuna nga anak da a lalaki nga agtawen ti 9.
