Sinentensiaan ti US federal judge idiay Florida iti maysa a Filipino iti tallopulo a tawen a pannakaibalud gapu iti panangipanna ti multiple hidden cameras kadagiti cruise ship guest rooms a pagtartarabakuana, tapno mairekord dagiti video dagiti lamolamo a babbai.
Nabigbig ti suspek a ni Arvin Joseph Mirasol, agtawen iti tallopulo ket uppat, taga-Batangas, maysa a stateroom attendant, pleaded guilty iti serial recording kadagiti video dagiti ubbing a babbai sipud idi nangrugi nga agtrabaho iti Symphony of the Seas idi December 2023.
Maibasar ti court documents, nasarakan dagiti imbestigador dagiti pornographic videos iti USB stick a kukua ni Mirasol a naglaon iti sumagmamano a video dagiti lamolamo a babbai kadagiti banio ti cruise ship agraman dagiti video ti child porn.
Segun kadagiti imbestigador, naka-focus dagiti video iti genital areas dagiti ubbing ken naamuan ti Homeland Security Investigation (HSI) agents a dagiti ubbing ket agtawen iti dua agingga iti sangapulo ket pito.
Kabayatanna, inamin ti suspek a saanna a makontrol ti ububraenna uray ammona nga illegal.
Gapu dayta, maibalud ni Mirasol iti Federal Detention Center idiay Miami Florida ti 360 months wenno tallopulo a tawen ken nairekomendar a maibalud iti facility a mangipapaay iti psychological counselling ken sex offender treatment.
