P518.8 billion ti 2025 budget iti kiniddaw ti Department of Agriculture (DA) manipud iti Department of Budget and Management (DBM) ngem nasurok laeng a P200 billion ti nailatang.
Dayta ti gapuna a kidkiddawen ni Camarines Sur Representative Ray Villafuerte a maipangato ti DA budget iti P88 billion para iti sumaruno a tawen, tapno matungpal ti gobierno ti target na a food security.
Segun ken ni Villafuerte, maragpat daytoy no adda umdas a pondo tapno maipangpangruna ti pannakaibangon dagiti irrigation ken postharvest facilities, food terminals wenno processing centers, ken Kadiwa outlets iti intero a pagilian.
Innayon pay ni Villafuerte a no saan nga umdas ti budget para iti agrikultura ket mangitunda ti parikut iti suplay ken presio ti bagas, ken dadduma pay a produkto ti agrikultura ken ngumina iti presio dagiti magatang.
