PHP24K ti natakaw manipud iti maysa a product specialist ti Kservico Bantay Branch idiay Barangay Zone 5, Bantay, Ilocos Sur.
Nabigbig ti biktima a ni Marie Rose Apple Mendoza Lofredo, agtawen iti duapulo ket walo, product specialist ti KServico, taga-Barangay San Julian Norte, Vigan City.
Ti suspek ket ni Lawrence Raras Pagoa, agtawen iti tallopulo, taga-Barangay Solid West, Vigan City.
Nagreport iti Bantay Police Station ti biktima ket maibasar iti naala a CCTV footage, alas dyes kwarenta y singko iti bigat ti June 25, maysa kadagiti kliyenteda a nakasuot iti green jersey shirt nga adda nakaprint a nagan ken number na iti likod a “Tatum” “O”, nakashorts ken tsinelas ti simrek iti establisimiento nga agbabayad iti inutangna a cellphone.
Ti nautang nga android phone a Vivo ket nairehistro iti nagan ni Roderick Ramolete Rafanan, taga-Barangay Paratong, Sta. Caralina.
Bayat ti payment transaction, innala ti suspek ti kuarta iti uneg ti showcase cabinet ti biktima s ana imbulsa.
Ti kuarta ket kukua ti biktima a naganansyana manipud iti online business na.
Bayat ti panagsalsaludsod ken ni Roderick Rafanan, naipakita kenkuana ti CCTV footage ti insidente ket inaklunnna a ti lalaki a nagibulsa iti kuarta ket live-in partner na.
