Patien ti maysa a political analyst a dakkel unay ti PHP20M a mailatang para iti maikatlo nga State of the Nation Address ni Presidente Ferdinand Marcos Jr. inton July 22, 2024, aldaw ti Lunes.
Iti pannaki-uman ti Bombo Radyo Vigan ken ni Atty. Michael Henry Yusingco, ibilangna a nagastos ti nasao a gatad a mausar para iti SONA nangruna ta adu dagiti umili nga agrigrigat gapu iti kangina dagiti magatang.
Kunana nga ar-aramaten laeng ti presidente ken dagiti kaduana nga agpampanday-linteg ti SONA tapno agipannakkel.
Para ken ni Yusingco, mabalin met a simple ti SONA ta ti napateg ket ti panagsasango ti presidente, dagiti senador ken congressman iti maysa a joint session.
Imbes a pagbalinen a nagarbo ti SONA ket kunana a nailatang laengen koma ti gatad kadagiti ad-adda a pagkasapulan ti pagilian.
