VIGAN CITY – Insingasing ni ACT Teachers Partylist Rep. France Castro a ti sangapulo a milyon a pisos nga indiaya ni Presidente Rodrigo Duterte kadagiti makaduktal ti COVID19 vaccine ket nasaysayaat no inayon laengen iti badyet ti Research and Development.
Iti pannaki-uman ti Bombo Radyo Vigan kenni Castro, saan laeng a maymaysa a tao ti makabael a mangduktal iti bakuna no di ket dayta ket adalen ken buklen ti grupo dagiti siyentista ken agsuksukisok.
Ingunamgunam ti kongresista a nabayagen a nabaybay-an ti badyet para iti nasao nga ahensia isu a tattan ti kasayaatan a gundaway nga ilatangan manen ti gobierno ti pondo tapno adda ti maaramat a paggatang kadagiti baro nga alikamen a makatulong para iti nadardaras a pannakaduktal iti bakuna kontra iti COVID19.
Kabayatanna, patienna a sakbay iti in-inut a panangikkat iti enhanced community quarantine ket kasapulan pay nga adda iti siyentipiko a pagibasaran ti Department of Health no kasapulan iti pannakaipatungpalna.
Para kenkuana ket nasaysayaat no mass testing ti maipatungpal ken saan a lockdown tapno dagiti apektado iti nasao a sakit ket mailasinda kadagiti saan nga apektado.
