VIGAN CITY – Inlawlawag ni Provincial Environment and Natural Resources Office Edgar Yabes a dredging ti maisaysayangkat iti kabaybayan ti ili ti Santa ket saan a black sand mining.
Iti pannaki-uman ti Bombo Radyo Vigan ken ni Yabes, saan a maliklikan nga adda mainayon a black sand iti panag-dredge ngem adda pagannurotan a no mairaman ti innem a porsiento agpangato a metallic content ket masapul a mabayadan.
Segun kenkuana, saan a black sand mining iti gagara dagiti barko no diketdi incidental laeng ti pannakaalada ti black sand bayat ti dredging.
Kinunana nga agpatingga iti Banaoang Bridge ti river zone isu a madalusan tapno naannayas ti panagayos ti danum iti karayan.
Impalagipna a tawen 2012 pay laeng idi naaramid ti memorandum of agreement ngem naitantan gapu kadagiti kabaroanan a pagannurotan agingga a naadal manen ti panag-dredge ken pannakaipatungpalna.
