Nangisayangkat iti manhunt operation tapno sapulen ti naglibas a Person Deprived of Liberty a ni Paul Alegre Andia Jr., agtawen iti uppat a pulo ket siam, taga-Barangay Manangat, Caoayan.
Alas onse iti agsapa ti March 5, 2025, nagreport ti BJMP-Vigan City iti Vigan City Police Station mainaig iti panaglibas ti PDL ken nagkiddawda iti tulong.
Dagus a nagresponde dagiti kameng ti Vigan City Police Station ket idi nagsaludsodda iti personnel on duty iti dayta a kanito, pinasingkedan met ni Jail Officer 1 Art Angello Atud, backspot duty nga iti alas kuatro y media iti isu met laeng nga aldaw, pimmanaw a napan iti CR.
Ni Jail Officer 1 Mark Christian Tejada a kasangsangpetna iti opisina ket binulodna met ti tulbek ti selda manipud ken ni Jail Officer 2 Rey-An Formoso nga isu ti akin-iggem ti selda, tapno mapan iti comfort room ta ti designated comfort room-da ket ar-aramaten ni Atud.
Linukatan ni JO1 Tejad ti Dorm 1 tapno usaren ti CR ti nasao a selda, ket kabayatan ti kaaddana iti uneg ti kuarto, saanna a nadlaw a pinanawan ti suspek ti seldana.
Nakita ni JO2 Formoso ti suspek ngem impagarupna a mapan laeng iti kapilya.
Iti dayta a gundaway, napan met ni JO2 Michael Solis ni Formoso tapno agperma iti papeles.
Ket kabayatan iti dayta, nakigtot idi makitana ti suspek nga addan iti isim ti jail building nga asideg iti back post tower nga agturong iti daya.
Idi makitada ti suspek, dagus a tinaray da Solis ken Formoso ti sangwanan a gate ti jail facility tapno kamaten ti PDL ngem saanda a nagballigi.
