Maysa kadagiti kayat ni Presidente Ferdinand Marcos Jr a malagip kenkuana dagiti Pilipino ken iti pakasaritaan ti pagilian ti saan a panangisuko iti isyu iti West Philippine Sea.
Dayta ket idi masaludsod mainaig iti foreign policy ken ti panangilabanna iti karbengan ti pagilian iti West Philippine Sea nga ag-agawen ti China.
Segun ken ni Marcos, saanna pulos nga isuko ti soberanya ti pagilian ket itultuloyna nga ikalintegan kadua dagiti umili.
Inlawlawag ti presidente a saan a makiriri ti pagilian ngem ilabanna ti teritoryo manipud iti panangip-ipit kadagiti mangngalap a Pilipino ken ti puersa ti gobierno nga agbantay ken agpatrolya iti teritoryo ti pagilian.
Maipalagip a masansan ti pannaka-harass ken pannakaipit dagiti Pilipino a mangngalap agraman dagiti barko ti Philippine Coast Guard manipud iti China Coast Guard ken Chinese militia iti West Philippine Sea.
