Numan pay awan ti naituding a deadline, kayat ni Presidente Ferdinand Marcos Jr a malpas iti uneg ti tallo a bulan dagiti gakat a kiniddawna iti Kongreso a mapagbalin a linteg ken maamyendaran.
Segun ken ni Palace Press Officer Atty. Claire Castro, no nasapsapa a malpas ken maamyendaran ket nasaysayaat para kadagiti Pilipino.
No kabaelan la ketdi dagiti agpampanday-linteg a malpas iti uneg ti tallo a bulan dagiti gakat a kayat ti Presidente a matignayan ket nasaysayaat tapno marikna dagiti Pilipino ti epektona ken maksayan ti gastosda.
Innayon ni Castro a no nagbalin a linteg ken naamyendaran dagiti gakat a kiniddaw ti Presidente ket dakkel a pakalag-anan dagiti Pilipino.
Karaman kadagiti linteg a dinakamat ti Presidente iti State of the Nation Address-na ti panangamyendar iti panangbuwis para iti nalawlawa a tax exemption, panangikkat iti corporate income tax para kadagiti bassit a negosio, estate donor’s tax ken value added tax, agraman ti pannakaamyendar iti EPIRA law.
