Pinasingkedan ni Presidente Ferdinand Marcos Jr. nga imbilinna ti amin a maseknan nga ahensia nga ituloy ti panang-monitor iti kasasaad dagiti Pilipino kadagiti apektado a lugar iti riri ti nagbaetan ti US ken Israel kontra ti Iran.
Impaganetget ni Presidential Communications Office (PCO) Undersecretary ken Palace Press Officer Atty. Claire Castro a nalawag ti bilin ni presidente Marcos nga ited amin a tulong ti gobierno kadagiti Pilipino nga adda idiay Middle East.
Ipasigurado ni Castro nga agtaltalinaed a nakasagana dagiti ahensia iti posible a repatriation dagiti Pilipino iti oras nga aglukat ti airspace dagiti apektado a lugar.
Kabayatanna, mabalin nga agkiddaw dagiti Pilipino iti tulong manipud iti Overseas Workers Welfare Administration (OWWA) babaen kadagiti emergency hotline numbers da.
