Inlawlawag ti Malakanyang a saanna kayat a sawen a mabaybay-an ni Presidente Ferdinand Marcos Jr ti trabahona tunggal mangilatang iti orasna iti pamiliana.
Segun ken ni Presidential Communications Usec Claire Castro, agtultuloy a bambantayan ti Presidente ti sitwasion kadagiti lugar nga inapektaran ti awan sardayna a tudo ken mangted pammilin kadagiti ahensia ti gobierno para iti panangsungbat kadagiti pagkasapulan dagiti biktima.
Dayta ket kalpasan a nagwaras ti video ti Presidente nga agkankanta iti panangrambak iti panagkasangay ti inana a ni First Lady Emeritus Imelda Marcos.
Impaganetget ti Malakanyang a ti panangilatang iti oras iti pamilia ket saanna kayat a sawen nga agsarsardeng metten ti presidente kadagiti trabahona kas mangidaulo iti pagilian.
