VIGAN CITY – Namnamaenen dagiti sumagmamano a Pilipino nga agtrabtrabaho kas factory workers idiay South Korea a kumapsot iti produksyon dagiti pagtrabtrabahuan da a kompanya kadagiti sumarsaruno a bulan gapu ti coronavirus disease 2019.
Ti report ni Bombo International Correspondent Eric Lores a taga- Refaro, San Juan ngem agtrabtrabaho idiay Seoul, South Korea, binallaagan idan dagiti manager da a kumapsot iti produksyon da kadagiti lako da inton umay a bulan agingga Abril ken kadagiti sumar-saruno pay a bulan gapu ti nasao a sakit, nangruna ket kaaduan kadagiti produkto da ket maibibyahe idiay China.
Nu pay kasta, saan da met nga agdanag agsipud ta saan met a naibaga kadakuada a nu kumapsot wennu bumassit iti produksyon dagiti lako da ket maikkat dan iti trabaho.
Ti agdama, natalged iti kasasaad dagiti pada na a Pilipino idiay Seoul, South Korea ta adayo da iti lugar a nagrairaan ti COVID- 19 ngem naka-alerto da latta ken sursuruten da dagiti bilin ti Philippine embassy tapnu saan da a maakaran iti sakit.
