Awan ti nadangran iti napasamak nga uram iti David Reynaldo Tongson Bldg., General Luna Street, Barangay 1, Vigan City, Ilocos Sur gapu iti mapapati a panangipurwak ti maysa nga ubing iti nasindian a puspuro.
Nakaawat ti Vigan City Police Station iti report nga adda maur-uram iti nasao a lugar.
Dagus a napan dagiti pannakabagi ti linteg iti lugar kaduada ti Bureau of Fire Protection-Vigan City ket nadanonda a maur-uram ti nasao a pasdek.
Segun iti maysa a menor de edad a nakaimatang, kabayatan ti panagay-ayamda iti uneg ti kuarto, adda karrubada a menor de edad a nagipurwak iti nasindian a puspuro kenkuana ngem nalisyanna isu a timmama ti puspuro iti katre.
Gapu iti naangin a paniempo ken nalaka a mauram a banag iti uneg ti kuarto, nadaras a nagkayamkam ti uram.
Madukduktalan pay laeng no mano ti gatad dagiti nauram a sanikua.
