VIGAN CITY – Immapela ni Burgos Mayor Nathaniel Escobar ken ni Governor Ryan Singson a masukatan iti address ni IS-C56 ta kayatda a mapagtalinaed a covid-19 free iti masakupanna.
Iti pannaki-uman ti Bombo Radyo Vigan ken ni Mayor Escobar, kalikagumda a ti maipan nga address ni IS-C56 ket Makati City ta isu iti usto a lugarna saan ketdi nga idiay Paduros, Burgos.
Segun ken ni Mayor Escobar, adu iti makapaneknek a saan nga agindeg ti pasyente iti nasao a lugar.
Nupay kasta ket saan a naapektaran ti operasyon ti tiendaan ti nasao nga ili ta insigida a napakammuan dagiti umili inaig iti nasao a banag.
Pinasingkedanna pay a no man bilang nga agnegatibo iti covd-19 ti nasao a pasyente ket awatenda latta idiay Brgy. Paduros ngem dumalanto manen ti 14-day quarantine ken ma-test ta no agnegatibo ket mapalubusanton a bisitaenna ti anak ken nobyana.
Maipalagip nga idi August 16 ket nairekord iti maika-limapulo ket innem a kaso iti covid-19 ditoy probinsia a ti pasyente ket maysa a welder ken returning overseas Filipino manipod Kingdom of Saudi Arabia a nai-address idiay Paduros, Burgos ngem inkalintegan ti Mayor a saanda a kalugaran ti nasao a pasyente.
