Pormal a nangipila ti resolusion ti Makabayan Bloc iti Kamara tapno dumalan iti imbestigasion ti narpuog a maipatpatakder ti pasdek idiay Angeles City, Pampanga a nakatayan ti tallopulo a construction workers.
Pinermaanen ti Bills and Index ti Kamara kas House Resolution (HR) No. 1120 ti resolusion ti nadakamat a grupo para iti pormal a panagdenggeg mainaig iti trahedya a napasamak idi Marso 24.
Gagem ti nadakamat a resolusion a protektaran ti amin a klase ti mangmangged iti lugar a pagtrabtrabakwan da.
Segun kada ACT Teacher party-list Rep. Antonio Tinio, Gabriela party-list Rep. Sarah Elago ken Kabataan party-list Rep. Renee Co, saan nga isolated case ti pannakarpuog ti pasdek gapu ta idi 2025, in-report ti Institute for Occupational Health and Safety Development iti incident report da a 369 a mangmangged ti nadisgrasia ken natay iti lugar a pagtrabtrabakwan da ken 516 ti nadunor.
