Agtultuloy iti imbestigasyon dagiti otoridad iti napasamak a pannakapaltog iti namin-ano a daras iti maysa a pagtaengan idiay Barangay San Sebastian, San Vicente.
Ti biktima ket babai nga agtawen iti limapulo ket dua, naasawaan, self-employed nga agnaed iti nasao a lugar idinto a dagiti suspek ket saan a nabigbig.
Iti pannaki-uman ti Bombo Radyo Vigan ken ni PCpt. Sherwin Beroña iti San Vicente Municipal Police Station, nakaturogen ti biktima kaduana ti inana ken anakna iti uneg iti pagtaenganda idi nariingda gapu iti napigsa nga uni a nangngeganda ken naangot ti anakna nga adda agat-burbura ket idi napanda kitaen iti bakante a kuarto ket isu ti pannakakitada iti adu a tama iti bala iti paltog.
Segun ken ni Beroña, mapapati a gagem dagiti suspek a butbutngen laengen ti biktima ta awan iti nadangran iti nasao a pammaltog.
Dagiti nakita a basyo ket mapapati a naggapu iti 5.56 armalite a dagitoy ket lima iti naitama iti steel window, maysa iti baba wenno semento ken uppat iti uneg iti pagtaengan.
Kitkitaenen dagiti otoridad iti posible a pakainaigan iti nakautangan idi kallabes ti biktima wenno no adda anggulo maipanggepo iti anakna.
Manarimaan iti panagkita dagiti polis kadagiti CCTV a mabalin a makatulong kadakuada tapno maduktalan no siasino dagiti suspek.
